Pudder under Høgenibba

I dag ville Kåre og underteikna prøve oss på Høgenibba i Hornindal. I dette området ligg det litt meir snø enn det vi finn i "dalstrøka innanfor". Ved skitrekket i Grendadalen spende vi på oss skia, godt kledde sidan temperaturen var ca -13 grader C.

Høgenibba signert med telemarksvingar!

Og skiføret var upåklagleg - med pudder heilt til siste kneika mot toppen. Vindstille og kaldt klart veir gjorde turen til ei oppleving.

Kåre på toppen. Gullkoppen i bakgrunnen til høgre.

På veg oppover observerte vi fleire sjølvutløyste skred, men snøpakken virka likavel stabil. Men i siste bratte kneika under toppen fekk vi eit nytt varsku om at ein skal passe seg: Vi gjekk med ca 30 m avstand i rundt 25 graders gradient, og plutseleg drønna det kraftigt. Snødekket sprakk, men ingen utglidning. Vi gjekk i eit område med ein del stein som stakk opp, og følte oss rimeleg trygge på vegvalet. Vi lista oss vidare dei siste meterane til topps.

Underteikna under toppen

Omsider stod vi på toppen, og kunne nyte utsikta mot Sunnmøre og fjella i indre Nordfjord. Turen ned igjen gjekk raskt unna i flott laussnøv, og etter ein times tid var vi tilbake i Stryn.

Høgenibba midt på kartet

Konklusjon:
Den lange kuldeperioden vi har hatt, kan medføre danning av begerforma snøkrystall nede i snøpakken. Dette kan skape ustabile forhold, som vi kanskje må slite med vidare utover vinteren. Forholda ser ut til å vere langt meir utstabile i vinterfjellet i år enn i fjor! Gjer derfor fornuftige vegval både opp og ned igjen!

God tur!

PS! Den 13. februar er det Høgenibba Fjelltelemarksrenn. Meir info her.